Mitologiaz beteko dira Bilboko 2026ko Aratusteak

Aurtengo Bilboko Aratusteak aurkeztu ditu gaur Jai Batzorde Mistoak Bilboko Berreginen Museoan. Lehenik eta behin, aurtengo Farolin eta Zaranbolas aurkeztu ditugu: Imanol Ituiño aztia eta Mertxe Gil Goloka antzerki taldeko antzezlea, hurrenez hurren. Aurtengo Aratusteetarako Udalak eta Bilboko Konpartsek prestatutako egitaraua ere aurkeztu dugu. Mitologia aukeratu dugu aurtengo mozorrorako gai gisa.

Mitologia irudikatzeko erronka botako diete aurtengo Aratusteek bilbotarrei. Halaxe erabaki du Bilboko Jai Batzorde Mistoak eta halaxe jakinarazi dute gaur Bilboko Berreginen Museoan egindako prentsaurrekoan. Gai hori ordezkatzeko, ezin hobeto ezagutzen duten Farolin eta Zaranbolas izango ditugu: Imanol Ituiño de Miguel aztia eta Mertxe Gil Goloka antzerki taldeko antzezlea. Ituiño izango da beraz, Farolin, Aratusteetako bi pertsonaietatik zintzoena, serioena, baina bilbotar harroa, halere. Santutxuarra da Ituiño, hain zuzen, eta horrez gain, ikus-entzunezkoen zalea, eta aztia eta ilusionista ere bada. Zaranbolas, pertsonaia bihurriena, Mertxe Gil Vallejok hezurmamituko du. Bilbotarra da bera ere, antzezlea eta txotxongilolaria, Goloka taldean aritu da 1983tik. Beraiek izan dira, egunez egun, Aratusteetan izango dugun programazioa aurreratu digutenak.

Bilboko Aratusteek aurten ere kaleak hartuko dituzte, eta hiria jai-gune ireki eta parte-hartzaile bihurtuko dute. Otsailaren 7tik 17ra bitartean, programazio zabal eta askotarikoa eskainiko dugu, kultura herrikoia eta aniztasuna erdigunean jarrita.

Hasieratik, eta urtero bezala, Aratusteen izaera kritiko, ironiko eta sortzailea izango da protagonista otsailaren 7an Bilboko Kafe Antzokian, Kopla Txikien lehiaketarekin.

Aratuste Eguenean eta Barikuan, Farolin eta Zaranbolas izango dira protagonistak: maskara trukea, kalejirak, epaiketa eta antzerkia izango dira. Jai-giro alaia izango dugu Bilboko Alde Zaharrean egun horietan.

Aratuste Zapatua izango da jaiaren unerik jendetsuena. Goiz-goizetik, Bilboko kaleak mozorro, erraldoi, fanfarre eta kalejiraz beteko dira. Egun osoan zehar, haur, gazte eta helduentzako jarduerak izango ditugu: jolasak, ikuskizunak, musika-emanaldiak eta beste hainbat ekintza. Abandon egingo diren banakako zein talde-mozorroen lehiaketek protagonismo berezia izango dute: sormena, irudimena eta talde-lana sarituko dira.

Igandean, gastronomiak hartuko du lekukoa, ohiko torrada eta indaba lehiaketekin, giro herrikoi eta parte-hartzailean. Azkenik, Sardinaren Hiletarekin emango diegu amaiera Aratusteei, martitzenean.

Amaitzeko, bilbotarrak parte hartzera gonbidatu dituzte Gilek eta Ituiñok. Bilboko Konpartsek gogorarazi dute, nolanahi ere, Aratusteak jai libreak direla eta, hortaz, ez dutela lekurik izango mozorro edo jarrera matxistek, arrazistek edo baztertzaileek. Espazio seguru bat sortzeko deia ere egin dugu, mitologiaz jantzitako Aratuste hauek denon artean gozatzeko, kopla txikietatik hasi eta sardinaren erreketara arte.

Gora Bilboko Aratusteak!